Плоштадот Свети Петар денеска исполнет со тишина, жалост, солзи и молитви. Десетици илјади луѓе од сите делови на светот се собраа во Ватикан за да ја оддадат последната почит на Папата Франциск, првиот латино-американски папа кој на светата столица беше 12 години. Ќе остане запаметен како Папа кој ги стави сиромашните на прво место и ја водеше Црквата со отворено срце. Над 150.000 луѓе го исполнија Плоштадот. Меѓу нив присуствуваа и светските лидери Трамп, Макрон и украинскиот претседател Зеленски. Претседателот на САД, кој има долгогодишна врска со Католичката црква, беше меѓу првите кои ги оддадоа своите почести.
„Јас ја освоив католичката поддршка, и мислам дека ова е прв пат кога републиканец ја освои таа поддршка. Ја добив поддршката со голема разлика, и имам одлична врска со католиците“, изјави американскиот претседател Доналд Трамп.
На погребот на потифот присуствуваа 164 делегации на светски лидери и претставници на кралски семејства, меѓу нив е и македонската претседателка Гордана Сиљановска-Давкова. Деканот на Колегиумот на кардинали, Џовани Батиста Ре, кој ја водеше светата миса и ја исполни последната желба на папата за скромно и достоинствено испраќање, ја истакна неговата непоколеблива посветеност кон мирот и правдата. Спомена и за неговата постојана борба за мир и за неговата безусловна посветеност на најранливите, особено во време на глобални конфликти и човечки страдања.
„Папа Франциск беше човек на мир и понизност, кој ја водеше Црквата не само како духовен водач, туку и како човек што се грижи за најсиромашните. Неговото заминување е огромна загуба за светот, но неговото наследство ќе продолжи да влијае на Црквата и светот”, изјави Џовани Батиста Ре, декан на Колегиумот на кардинали.
Во поголемиот дел од светот, Папа Франциск беше љубен како човек кој сакаше да ја трансформира Црквата и да ги заштити најранливите. Од неговите постојани повици за мир до жестоката борба за правата на сиромашните, неговото наследство ќе живее долго. И додека светските лидери беа во Рим, илјадници верници од цел свет го оплакуваа Папата во своите локални цркви. Во Париз, во Нотр Дам, христијаните се собраа на миса, вклучувајќи и многу луѓе кои го доживеаја Папата како човек кој беше близок до сите.
„Тој беше следбеник на Христос, скромен, близок до луѓето, со силен карактер, кој ја потврди верата на Црквата, но секогаш со човечност“.
„Плачев многу. Јас сум голем верник, и кога дознав во утринските часови, бев во црква и плачев без престан. Како и тој, многу сум приврзана за Богородица, и бидејќи и тој беше многу поврзан со неа, го сакам уште повеќе.“
По церемонијата во Рим, ковчегот на Папата е пренесен до црквата „Санта Марија Маџоре“, тука ќе биде и погребан. Неговото заминување е загуба не само за Црквата, туку и за светот кој го гледа како симбол на надеж и отвореност. Папа Франциск беше повеќе од духовен лидер, тој беше човек кој ја поттикнуваше хуманоста и правдата. Во Ватикан ќе продолжи собирот на 135-те кардинали, чијашто конклава за избор на нов папа најверојатно ќе почне на 5-ти мај.
