Голема полициска акција во државата. Уапсени се десет лица, од кои четири од Гевгелија, три од Струмица, две од Струга и едно лице од Демир Капија. Истите се теретат за неовластена набавка , продажба и пуштање во употреба на марихуана. При извршените претреси на локации во Струмица, Гевгелија и Битола запленети се пари и поголема количина на дрога која потекнува од правен субјект регистриран за извршување на дејност одгледување на зачински, ароматни и лековити растенија наменети за медицински цели, информират од МВР. Приведените лица ќе бидат изнесени пред судија на претходна постапка, а пронајдената дрога ќе биде дадена на вештачење.
Засега полицијата не открива имиња на лицата кои ја формирале криминалната група. Сепак неофицијално во полициската мрежа се фатил и поранешен градоначалник на струмичката општина Ново Село, кој пред пет години на јавноста и стана познат откако го фатија со шверц на цигари во близина на македонско-бугарската граница и заработи казна затвор од 18месеци. Откако ја одлежа казната што му беше намалена, семејството на бившиот градоначалник се преструктуира и заедно со неговиот син влегоа во бизнисот производство на електрична енергија . Во 2020 настанува промена во дејноста на фирмата, која откако добила лиценца почнала да се занимава со одгледување на канабис.
