Претседателот на македонското друштво „Сонце” и лидер на единствената македонска партија во Албанија, МАЕИ, Васил Стерјовски оствари средба со Ана Соле Мена, виш експерт за повеќејазичност во Европската комисија.
-Разговаравме за важноста што Европската унија ѝ ја придава на повеќејазичноста и на зачувувањето на малцинските јазици како дел од европскиот идентитет. Ана Соле Мена ја истакна важната улога на европските програми Erasmus+ и Horizon Europe, кои обезбедуваат можности за изучување јазици, технолошки развој и продлабочување на меѓународната соработка, информираше Стерјовски.
Таа нагласила дека јазичната разновидност претставува огромно богатство за Европа, придонесувајќи за поголема мобилност, соработка и општествена кохезија.
-Во разговорот ја запознав и со состојбата на Македонците во Албанија и со нашите заложби за зачувување и унапредување на македонскиот јазик, култура и идентитет, додаде тој.
Искажав верба, нагласува, дека европските политики и програми за поддршка на јазичната разновидност отвораат нови перспективи за македонската заедница во Албанија, особено за младите генерации, образованието и примената на современи технологии во заштитата на мајчиниот јазик.
