Пријателството помеѓу Македонија и Австрија мора да трае – ова е заклучокот од средбата помеѓу премиерот Христијан Мицкоски и претседателот на Австрија Александер Ван дер Белен.
„Зборувавме за заедничката соработка и воспоставување на пријателство кое мора да трае.
За иднината на државата и регионот“, напиша премиерот Мицкоски.
Претходно Мицкоски се сретна со австрискиот министер за надворешни работи Александер Шаленберг.
„Разговаравме за заедничките интереси, стратешките цели на Македонија и потребата за придвижување на процесите“, напиша премиерот.
Формулата од Преспанскиот договор, за одложено дејство на уставните измени да се примени во случајот со Бугарија – така ќе се заштитиме од подоцнежни условувања. Овој план за откочување на евроинтеграциите премиерот Христијан Мицкоски го претстави на 20-тиот Европски самит во Салцбург посветен на Европската Унија и реформите.
Според него, Македонија чека премногу долго пред портите на ЕУ, со години е жртва на билатерални спорови – и додека Владата е целосно посветена на изнаоѓање решение и активен дијалог, од другата страна мора да има волја но и дела – европските челници да покажат дека сакаат да бидеме дел од Блокот.
Европската судбина на земјава, ваква во моментов – очекувано, предизвикува фрустрации и незадоволство кај граѓаните.
