И покрај лошите временски услови, во Кичево со градежна механизација се расчистуваат каналите и коритото на Зајашка Река, која е со зголемен водостој, но до овој момент опасност од повторно излевање нема. Сепак, ситуацијата и понатаму е критична во населбата „Прилепска“, таму услови за живот нема.
Евакуираните жители, кои привремено се згрижени во спортската сала „Христо Узунов“, се благодарни бидејќи имаат сигурен кров над глава. Условите не се идеални, што е и разбирливо, има околу 150-тина лица, но, велат, имаат сè што им треба.
– „Храна има, доктори има и лекови ми запишаа, требаа да дојдат, ама не се уште дојдени, а јас имав срцев удар и морам да ги пијам тие апчиња. Дали е топло? Добро е, топло е. Сега засега е многу подобро, дома не можеш да застаниш, вода до овде има внатре во куќите, над метар и пол, не можеме дома да одиме.“
– „Лом е уште, има три метра вода, насекаде е само кал, кај да одиме се чудиме, нема каде да одиме. Каква е ситуацијата овде, дали доаѓаат доктори? Задоволни сме, проблеми немаме.“
– „Значи, лекови ако ни треба нешто ни носат, сè е на место. Мене ми е уништена цела куќа, нема каде да одам, барам помош од државата, ги молам сите да се преземат мерки. За никаде сме, јас не можам ни да седам овде, еден тоалет е, немаме каде да се капиме, немаме алишта, немаме ништо. За да се вратам дома многу тешко е, цела куќа ми е уништена“ – велат погодените жители.
Волонтерите на Црвениот крст се постојано присутни на терен, внимателно ги следат состојбите и навремено одговараат на барањата и потребите на граѓаните. Благодарение на солидарноста на граѓаните и пристигнатите донации, истите се дистрибуираат согласно потребите на засегнатото население. Во соработка со Општина Кичево и локалните угостителски објекти, секојдневно се обезбедуваат и делат топли оброци за лицата сместени во прифатниот центар. Општина Кичево продолжува со засилен ангажман и континуирано ја следи состојбата на терен.
ТЕЛОП – Општина Кичево:
„Општина Кичево, преку надлежните служби, деноноќно работи на уредување и чистење на речното корито, со цел превенција и спречување на нови поплави по неодамнешните обилни врнежи. Активностите опфаќаат: расчистување на нанос, кал и отпад, зацврстување и обликување на коритото, подобрување на протокот на водата. Ги информираме граѓаните дека оние кои имаат можност можат да се вратат во своите домови и да започнат со расчистување, бидејќи од понеделник ќе започне теренска работа на комисијата за проценка на штетите.“
И во останатите региони во државава состојбата е стабилна, со зголемени водостои, а некаде има и излевање на реките. Поплавени се земјоделски површини, дворови, куќи, подруми и магацини, а надлежните вршат испумпување на водата, проширување и насипување на речните корита.
