Собранието денеска треба да ја одржи 94. седница, на чиј дневен ред преостанати се уште три точки – предлог за избор на член на Судскиот совет на Македонија, предлог на Законот за изменувањето и дополнувањето на Законот за пензиското и инвалидското осигурување, по скратена постапка, и предлог на Законот за изменувањето на Законот за утврдувањето јавен интерес и номинирањето стратешки партнер за имплементација на проектот за изградба на инфраструктурниот Коридор 8 (делница Тетово – Гостивар – Букојчани и проектот за автопатот Требеништа – Струга – Ќафасан) и на Коридорот 10 д (делница на автопатот Прилеп – Битола) во Република Северна Македонија, по скратена постапка.
Собраниската Комисија за изборите и именувањата утврди предлог-листа од двајца кандидати за избор на член на Судскиот совет на Македонија, што го избира Собранието: Cejфула Османи, доктор на правни науки од Градец, Врапчиште, и Apбер Исаку, дипломиран правник од Тетово.
Со предлогот на Законот за изменувањето и дополнувањето на Законот за пензиското и инвалидското осигурување, по скратена постапка, треба да се овозможува зголемувањето на пензиите во согласност со планираните политики на Владата.
Вицепремиерот и министер за транспорт Александар Николоски, вчера, при образложувањето за предлогот на Законот за изменувањето на Законот за утврдувањето јавен интерес и номинирањето стратешки партнер за имплементација на проектот за изградба на инфраструктурниот Коридор 8 (делница Тетово – Гостивар – Букојчани и проектот за автопатот Требеништа – Струга – Ќафасан) и на Коридорот 10 д (делница на автопатот Прилеп – Битола) во Македонија, пред пратениците истакна дека станува збор за техничка измена на само еден член.
– Имајќи предвид дека ЈПДП има релативно солиден буџет од сопствени извори и средства, сметаме дека, поради големината и значењето на проектот, добро е и тоа да е вклучено како носител и инвеститор во проектот – појасни Николоски.
