Пратениците денеска ќе расправаат за интерпелацијата на министерот за внатрешни работи Панче Тошковски, поднесена од пратеничката група на „Левица“. Пленарната седница е закажана за 11 часот.
Интерпелацијата беше поднесена на 14 април, а според „Левица“, се базира на десет основи. Партијата го обвинува министерот за нестручно, непрофесионално и неодговорно вршење на функцијата, што довело до низа противзаконски дејствија, скандали и спорни кадровски решенија во Министерството за внатрешни работи.
Пет од основите се поврзани со трагичната несреќа во Кочани, во која загинаа 62 лица, а околу 200 беа повредени. Како клучни пропусти, „Левица“ ги посочува: немање контрола врз дискотеката „Пулс“, нелегална употреба на пиротехнички средства и неукажување помош од полициските службеници за време на инцидентот.
Пратеникот Сашко Јанчев изјави дека МВР, под водство на Тошковски, потфрлило и во истрагата, особено поради тоа што таа не опфатила функционери блиски до ВМРО-ДПМНЕ.
Ова е втора интерпелација против министерот Тошковски. Претходната беше поднесена во јануари од страна на Европскиот фронт, предводен од ДУИ, заедно со интерпелации против уште четворица владини министри.
