Со 73 гласа „за“ и еден „воздржан“, Собранието го донесе Предлог-законот за Судскиот совет. „Овој закон ја поставува основата за силен, независен и транспарентен Судски совет, со цел да ја зајакнеме довербата на граѓаните во судството“, информира Министерството за правда.
Клучните новини што ги предвидува законот, според Министерството, се следниве: јавност во постапката за разрешување на претседател на Советот; прецизирање на критериумите за избор на „истакнат правник“; јавна расправа при избор на кандидати за несудски членови, за поголема транспарентност.
Законот предвидува и зајакнување на критериумите за избор, одговорност и разрешување на членовите од редот на судиите, како и јасни правила за дисциплинска одговорност на судиите и членовите на Советот.
Дополнително, се воведува обврска за образложени одлуки при избор и утврдување одговорност на судиите, како и рокови за преземање дејствија и прецизирање на постапката за жалба против одлуките на Советот.
„Со реформите што ги преземаме, Судскиот совет ќе биде силен гарант за владеење на правото и доверба во судството“, посочуваат од Министерството за правда.
