Вечерва околу 20 и 30 часот владиниот авион со шестмината евакуирани македонски државјани од Израел, се очекува да слета на скопскиот аеродром. Владиниот авион според најавите треба да полета од Египет околу 18 часот, со патниците кои беа изнесени од Израел со помош на дипломатските претставништва и по копнен пат беа однесени во Каиро.
„Лицата кои изразија подготвеност за евакуација од Израел се очекува во попладневните часови со владиниот авион да полетаат кон Скопје. Со тоа целосно ќе се заокружи процесот на враќање на сите граѓани кои побараа извлекување од Израел“, инфомираат од МНР.
Следните денови се очекува да бидат евакуирани и заглавените македонски државјани од Обединетите Арапски Емирати, Катар, Бахреин и Кувајт. Интересот за евакуација од погодените кризни подрачје на Блискиот исток постојано расте. Досега повеќе од 600 граѓани побарале помош од македонските власти да се вратат во Македонија. Само од Амбасадата во Абу Даби се евидентирани вкупно 505 македонски државјани, од кои од нив 458 престојуваат во Обединетите Арапски Емирати, 31 лице се пријавени во Кувајт, а 14 од Бахреин. Во Доха, пак, евидентирани се уште 141 македонски државјанин кои побарале информации или асистенција. Од Министерството за надворешни работи соопштија дека процесот на евакуација се реализира согласно веќе разработен план.
Изутрината авион со 138 патници, меѓу кои имало и Македонци полетал од Дубаи и слетал на аеродромот во Тиват. Предходно дел од македонските државјани се вратија со српски авион од Египет, а шестмина враќањето за Скопје го организирале во сопствена режија. МНР вчера информираше дека ќе издвои милион евра за евакуација на македонски државјани од земјите погодени од конфликтот на Блискиот Исток. Со одлука на Владата, веќе е почната постапка за јавна набавка за организација на чартер-летови за нивна евакуација.
