– Со тридневна програма, Општина Неготино ќе го одбележи 8 Ноември, денот на ослободувањето, информираше денеска неготинската градоначалничка Марија Нацева.
– Со низа активности што ќе се одвиваат од петок до недела, Општина Неготино ќе го одбележи најголемиот празник. Настаните започнуваат во петок со доделување ваучери за новороденчиња, следува турнир во гол-бал и турнир во табла, а ќе се одржат и традиционалните улични трки за учениците од основните и средното училиште – соопшти Нацева.
Таа сподели дека во сабота ќе започне градското првенство во брзопотезен шах, во музејот на градот ќе има изложба на ликовни уметници од општината, а во вечерните часови центарот на Неготино ќе го осветлат вечерните факели.
Притоа информираше дека централните настани ќе се одржат во недела на 8 Ноември со прием во градоначалничката кабинет и положување цвеќе на спомен бистите на паднатите борци во НОБ, по што следува одржувањето на свечената седница на Советот на општина Неготино во Центарот за култура од 11.00 часот.
Во рамките на празничната програма ќе се одржи и манифестацијата Неготинско младо вино на старата градска чаршија, со штандови на кои ќе бидат изложени и ќе можат да се дегустираат производи карактеристични за оваа општина, а ќе има и богата забавно музичка програма.
– Се покануваат сите, да присуствуваат на настаните од тридневната програма и да бидат дел од одбележувањето на празникот на општина Неготино – рече Нацева.
