Со бројни настани и збиднувања Охрид и оваа година ќе го одбележи патрониот празник 8 Декември – Свети Климент Охридски.
Чествувањата почнуваат в среда напладне со археолошко и јазично описменување преку литературата за деца и млади со второто издание на „Охридска археолошка азбука”, од проф. д-р Антонио Јакимовски, д-р Елизабета Томевска-Илиевска, м-р Маја Јаневска и м-р Иван Малезанов.
Во четврток со почеток во 11:00 часот во големата сала на Општина Охрид ќе се одржи промоција на книгата „Григор Прличев- вчера денес и утре” од Милчо Јованоски и НУ Библиотека „Григор Прличев”, а промотор ќе биде проф.д-р Зоран Тунтев.
Од 12 часот во Култ културниот центар планиран е настанот „Букви и зборови што создаваат светлина: Јазична работилница посветена на Свети Климент Охридски“ од Кристина Дукоска. Во 19 часот следува Осмодекемвриски концерт на учениците од ОМУ „Методи Патче”, додека од 19:30 ќе се одржи свечената приредба на ООУ „Св. Климент Охридски”.
На 5 декември со почеток во 11 часот во Големата сала на Општина Охрид ќе се одржи промоција на книгата „Охридски летопис книга втора” и „Охридски летопис комплетно издание” од авторите проф. д-р Павле Митрески и м-р Димитар Смилески, а промотор ќе биде проф.д-р Ѓорѓи Тоноски.
Во 12 часот во Спомен-куќата на Робевци ќе биде отворена изложбата „Прстенот симбол на завет, статус, моќ“ од етнолошката ризница на охридскиот музеј.
Во 19 часот ќе биде отворена традиционалната осмодекемвриска изложба на „Охридскиот фото клуб” во изложбениот салон на Центарот за култура. Во 20 часот на Големата сцена на Центарот ќе се одржи свечена приредба на СОУ „Св. Климент Охридски”. Во исто време на плажата „Кадмо“ ќе се одржи концертна промоција на ВИС „Билјана” – Охрид во чест на патронот Свети Климент Охридски.
На 6 декември со почеток во 18 часот во Центарот за култура „Григор Прличев” ќе биде отворена изложбата насловена „365 дена творештво на бакар“ од охридската уметничка Маја Чифлигароска и Копер краф – MAM, додека во 19 часот во големата сала на Општина Охрид ќе биде прикажан краткометражниот документарен филм „Обичен херој” на авторот и режисер Јован Цветкоски.
На 7 декември во 12 часот на Големата сцена на Центарот за култура ќе се одржат Регионални смотри на СОФАМ -Фолклорна смотра на ансамблите од Југозападен регион, во 18 часот самостојна изложба „Мечта“ на уметнички слики од охридската уметничка Јана Маркоска-Наумовска во галеријата „Охридска порта Љубица” .
На 8 декември во 10 часот предвидено е поклонување пред моштите на Свети Климент Охридски во манастирот „Свети Климент и Пантелејмон” на Плаошник, во 11 часот полагање цвеќе на споменикот на Свети Климент Охридски во Основното училиште што го носи неговото име, а напладен полагање свежо цвеќе на момументалниот споменик на Свети Климент Охридски на Градскиот плоштад, со врачување награди на најдобрите поетски творби на наградниот ученички литературен конкурс по повод Патронот на Охрид на Градски плоштад „Свети Климент Охридски”.
Во 18 часот ќе биде отворена изложбата на фотографии „Охридско секојдневние” од охридската фотографка Нина Ангелоска во Куќата на Уранија.
Чествувањата на патрониот празник ќе бидат заокружени вечерта во 19 часот со централната манифестација, Свечена академија што ќе се одржи во црквата Света Софија, каде ќе бидат врачени и годинашните највисоки општински награди и признанија.
