Скопје домаќин на лидерската средба ЕУ – Западен Балкан посветен на Планот за раст. Според агендата, на иста маса ќе седнат голем дел од лидерите во регионот а ќе присуствува и еврокомесарката за проширување Марта Кос.
Владата информира дека во фокус ќе бидат прашањата поврзани со реформите за обезбедување европско финансирање и заштита на потрошувачите. Лидерската ќе се одржи во понеделник и вторник, првиот ден ќе има два панела од кои првиот ќе биде посветен на Планот за раст. Вториот панел ќе биде посветен на конкретните механизми и поддршка за спроведување на Планот за раст и на него ќе учествуваат министри, претставници од Европската унија, регионални организации и меѓународни партнери.
Од Европската комисија велат дека, оваа лидерска ќе биде можност да се разговара за соработка меѓу земјите во области како што се заштитата на потрошувачите, туризмот и единствениот регионален пазар, со цел на унапредување на економската интеграција на Западниот Балкан во единствениот пазар на ЕУ.
Комисијата ќе предложи инвестиции од 87,7 милиони евра во рамките на Инвестициската рамка за Западен Балкан. Се очекува ова да привлече речиси половина милијарда евра приватни инвестиции во регионални проекти за чиста енергија.
-Планот за раст на Западен Балкан е вреден 6 милијарди евра и има за цел да ја поттикне економијата и да им помогне на шесте земји да се приклучат кон ЕУ. Планот финансира реформи и инвестиции во енергетиката, транспортот и дигиталната транзиција, објаснуваат од ЕК.
Покрај премиерот Мицкоски, на лидерската се очекува да присуствуваат и премиерите на Албанија, Босна и Херцеговина, Косово, Црна Гора и Србија.
