Во Скопје и денеска се оддава почит на жртвите од трагичниот пожар во клубот „Пулс“ во Кочани. Многу граѓани запалија свеќи на плоштадот „Македонија“ како почит за оние кои загинаа во оваа ужасна несреќа.
Денес во Кочани, Штип, Облешево и Скопје се одржуваат погребни церемонии за починатите. Погребната церемонија во Кочани, од каде потекнуваат повеќето од жртвите, започнува во 12 часот, а ќе чиноначалствува поглаварот на Македонската православна црква – Охридска архиепископија, Г.Г. Стефан.
Пожарот избувна на 16 март утрината околу 2:35 часот во клубот „Пулс“ во Кочани за време на концертот на групата ДНК. Во трагедијата загинаа 59 лица, меѓу кои и осум членови на групата. Меѓу жртвите има шест малолетни лица, а најстариот загинат имал 48 години. Повредени беа над 180 лица, кои се згрижени во болниците во земјата и во странство. Во Македонија се лекуваат 72 пациенти, а 101 се на лекување во странски медицински центри, додека три лица веќе се отпуштени на домашно лекување.
