Во присуство на многу деца со нивните родители, граѓани на Скопје и гости од целата држава вечерва на плоштад „Македонија“ свечено беше осветлена новогодишната елка и отворен Божиќниот маркет, со што официјално започна празничната програма „Скопје – новогодишна зимска бајка“, која ќе трае до 31 декември.
На настанот, пред палењето на светилките на елката кое копче симболично го притисна градоначлникот Орце Ѓорѓиевски, настапи хор составен од десетици деца од скопските училишта со изведба на празнични песни, а публиката уживаше и во балетска претстава.
Градоначалникот на Град Скопје, Орце Ѓорѓиевски, денеска пак порача дека целта е главниот град да се позиционира како современа европска метропола со континуирана и разновидна празнична содржина за сите генерации.
Програмата предвидува секојдневни музички настапи, диџеј сетови и уметнички изведби, а викендите ќе бидат посветени на најмладите со креативни работилници и анимации.
Централниот дел од програмата започнува на 27 декември со настапи, забави и награди во соработка со Државната лотарија на Македонија. Новогодишната ноќ ќе биде одбележана со концерти на македонски изведувачи, меѓу кои Каролина Гочева, Тамара Тодевска, Куку Леле и 2 Бона.
Трошокот за украсување на градот изнесува помалку од 70.000 евра, а програмата е наменета за сите граѓани без разлика на вера и нација, нагласи Ѓорѓиевски.
