Националната Установа-Универзитетска Библиотека (НУ-УБ) „Гоце Делчев“-Штип денеска одбележа 23 години од постоењето на Инфобусот, единствената мобилна информатичка библиотека. Директорката на НУ-УБ „Гоце Делчев“-Штип, Ивана Биџовска истакна дека денеска се прославува мисијата на еден проект, кој веќе над две децении ги премостува разликите и носи знаење до најдалечните населени места во општините Штип и Карбинци.
-Инфобусот денес опслужува приближна популација од 20.000 жители, посетувајќи 14 села и пет приградски населби во општините Штип и Карбинци, вклучувајќи ги и најтешко достапните планински средини. Со околу 7.000 корисници годишно и секојдневна посета на повеќе населени места, оваа „библиотека на тркала“ е клучен фактор за едукација на мултиетничкото население и децата до чии домови патот на книгата инаку тешко би стигнал – рече Биџовска.
Таа истакна дека во фокусот на јубилејот е визија за иднината — како во ера на вештачка интелигенција да го зачуваат интересот на младите за книгата и да ја зацврстат улогата на библиотеката како жив центар за учење. По повод одбележување на овој значаен јубилеј на „библиотеката на тркала“ на Градскиот плоштад „Слобода“ во Штип се одржа и културно-уметнички настан.
