Албанскиот премиер Еди Рама е под силен притисок да поднесе оставка по протестите на студентите и незадоволните граѓани, кои и денеска се на улиците низ Тирана. Досега во судирите се повредени повеќе од 270 луѓе, меѓу кои полицајци, демонстранти, граѓани, па дури и деца.
Рама се соочува со сериозен притисок и во сопствените редови. Тоа најконкретно го отслика неговата сопартијка Елиса Спиропали, која објави остро отворено писмо директно упатено до премиерот, барајќи политички одговор на протестите во Тирана, а не само репресија.
Спиропали го повикува Рама да се стави во позиција на демонстрант – млад човек кој стои меѓу толпата, ги слуша повиците и ги чувствува стравот и гневот што не се појавиле денеска. Според неа, сè започнало со оградите што ги одвоиле граѓаните од јавниот простор и институциите, а кои брзо прераснале во симбол на власт што дели и поставува бариери.
„Албанија над сè, а не партијата над сè. Ниту власта над сè“, порачува Спиропали, повикувајќи го Рама да донесе одлука со која ќе ја врати довербата.
Рама засега ја отфрла можноста за оставка и обвинува дека странски сили се мешале во протестите, кои, според него, не се резултат само на внатрешното незадоволство, туку во нив биле вклучени и надворешни влијанија и групи со екстремистички идеологии.
Во тој контекст ги спомена Русија, Иран, движењето Антифа, верски екстремисти и албански политички актери, опишувајќи ги како „конгломерат што го поттикнувал и релативизирал насилството“.
