Голем број експлозии и пожари биле пријавени во Санкт Петербург и Ленинградската област, каде што синоќа бил извршен масовен украински напад со дронови. Според локалните власти, руската противвоздушна одбрана соборила 57 беспилотни летала во регионот, додека украински канали известуваат дека меѓу можните цели биле пристанишната инфраструктура, нафтените танкери и центар за податоци.
Експлозиите го осветлувале ноќното небо над вториот по големина руски град, во кој живеат околу 5,6 милиони луѓе. Санкт Петербург се наоѓа на околу 856 километри северно од украинската граница. Засега нема информации за причинетата штета, ниту за загинати и повредени.
