Нови сведоци на Обвинителството во врска со трагедијата во т.н. кабаре „Пулс“ се изведуваат во судницата. Семејствата на жртвите од пожарот изнесоа сериозни обвинувања за обиди за влијание врз судската постапка. Пред почетокот на рочиштето, Јулија Златкова, мајка на трагично загинатиот Томас Златков, алармираше дека сведоци на Обвинителството се соочуваат со притисоци. Според наводите на семејствата, во затворот се овозможувало користење на мобилни телефони за комуникација со сведоци преку апликацијата „Вибер“, со цел да се влијае врз нивните искази. Златкова побара итна реакција од институциите за проверка на овие тврдења и на сите комуникации поврзани со случајот.
„Трагедијата во ‘Пулс’ претставува ‘геноцид врз една млада генерација’, предизвикан од алчност, корупција и несовесно работење. И по катастрофалниот настан, постојат обиди за прикривање и влијание врз судската постапка“, истакна Златкова.
Сведочеше командирот на пожарната во Кочани, Драган Апостолов, кој пред судот рече дека веднаш по дојавата за пожарот ги мобилизирал сите сили и побарал помош од околните градови, по што пожарникарите извлекувале повредени и гаснеле во исклучително тешки услови. Најмногу жртви имало кај главниот влез, а гаснењето било отежнато поради нефункционална противпожарна опрема во објектот. Пожарот бил локализиран околу 4 часот, по што биле пронајдени уште три изгорени тела.
Судскиот процес за трагичниот пожар продолжува со сослушување на сведоци на Обвинителството.
