Се шири списокот на кандидати за најпрестижната функција на изборите – титулата градоначалник на Скопје.
По партиите ВМРО-ДПМНЕ, СДСМ и Левица, своја кандидатура најави и граѓанската платформа „Независни заедно“, која утре ќе го промовира својот независен кандидат за градоначалник на град Скопје – професорот Горан Марковски, декан на Градежниот факултет. Тој ќе биде поддржан од платформата составена од „Шанса за Центар“, „Зелените за Гази Баба“ и „Групација 389“.
За разлика од нив, граѓанската иницијатива Зелен хуман град, која собира потписи за да формира политичка партија, и покрај најавите, остана без свој кандидат. Според нив, личноста со која требаше да учествуваат во трката за Скопје ја откажала кандидатурата од здравствени причини.
Со Марковски, бројката на кандидати за градоначалник на Скопје се качи на четворица – Орце Ѓеорѓиевски од ВМРО-ДПМНЕ, Каја Шукова од СДСМ и Амар Мециновиќ од Левица. Наскоро се очекува и двете партии од албанскиот политички блок, Вреди и ДУИ, да ги објават своите кандидати.
