Седум полициски началници и службеници од Штип и Кочани изготвиле, потпишале и одобриле документација „Пулс“ да работи во субстандардни услови. Имало пријави во полиција за кривични дела и нарушување на јавен ред и мир, но и покрај тоа во 2023 година била издадена лиценца, а полицијците дале позитивно мислење дека ги исполнува сите услови. Со својата согласност ѝ овозможиле кочанската дискотека да се стекне со лиценца за вршење угостителска дејност кабаре иако објектот не ги исполнувал законските услови за работа
Главениот инспектор за сообраќајни работи во Штип и еден самостоен инспектор за планирање резервен состав, превенција и справување со кризни состојби, констатирале дека кабарето ги исполнува законските услови во делот на заштита на јавен ред и мир и во делот на сообраќај, иако тоа не било така.
- „Осомничените сите заедно предизвикале значителна опасност за животот и телото на луѓето, овозможувајќи кабарето да работи во супстандардни услови при што починале 59, а 196 се здобиле со тешки телесни повреди“, рече Тошковски.
Првите луѓе во штипската полиција, одобриле и потпишале известување до Министерството за економија во која е констатирано дека кабарето ги исполнува законските услови без да направат целосна проверка пред да ја издадат согласност за лиценца за кабаре.
- „Петтиот, како документарист во ПСО на Кочани, изработил телеграма во која не навел точни и целосни податоци, дека во и близина на кабарето има пријавени нарушувања на јавен ред и мир и пријавени кривични дела, додека шестиот, во својство на заменик командир и седмиот како началник на Одделение за внатрешни работи Кочани, иако знаеле дека има повеќе пријавени нарушувања на јавен ред и мир во и близина на кабарето, истите вака изготвената телеграма ја одобриле и потпишале, со што како службени лица, не постапиле согласно прописите за мерките за заштита и не извршиле целосна и детална проверка во врска со издавање на позитивна согласност за кабарето и со тоа предизвикале опасност за животот на луѓето“, појасни Тошковски.
Сите седум полициски службеници се товарат за кривично дело тешки дела против општата сигурност.
- „Kако службени лица вработени во СВР Штип и ПСОН Кочани како соизвршители, осомничените изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа“ соопштија од ОЈО ГОКК.
Осомничените не се разрешените полициски началници и команданти од вчера, рече министерот. Четворица полициски функционери од Штип и тројца од Кочани Тошковски ги разреши не поради нивна инволвираност, туку да се води независна и непристрасна истрага во Кочани. На нивно место назначени се нови началници од Скопје, а во меѓувреме доколку се докаже нивна вина ќе се одговараат.
