Иднатата на државата е во производството на храна, а Македонија има плодна земја и тоа треба максимално да се искористи. Наместо младите да бегаат во странство, треба да останат дома и да развиваат сопствени бизниси. Вака размислува младиот Христијан Ристоманов, од Струмица, студент во четврта година на Земјоделскиот факултет, на штипскиот Универзитет. На нивите што ги наследил од својот татко и дедо, одгледува раноградинарски производи. За овој факултет се одлучил како што вели, да им олесни на своите родители, но и да создава и придонесува за државата во која е роден.
„ Ние произведуваме градинарски производи засеани на мали површини. Од културите произведуваме рукола, тиквици, магданос. Јас сакам мојот семеен бизнис да го унапредам со нови техники и технологии кои би можеле да ги примениме, со цел да го зголемам производството за во иднина да биде поисплатливо и порентабилно„ изјави-Христијан Ристоманов.
Но, не сите млади, својата иднина ја гледаат во обработката на земја. Бројот на млади земјоделци е мал. Лошиот пласман и ниските откупни цени во минатотот, се причина за многу млади, мотиката да ја заменат со компјутер, вели Јован Трајковски, преставник на семејна компанија која откупува земјоделски производи.
„Младите повеќе се орјентираат кон дигиталните работи со компјутери. Се помалку сакат да работат на нива бидејќи е тешка и макотрпна работа. Се работи по цел ден, а често пати се случува земјата да не ги даде очекуваните резултати или пак крајната цена да биде многу мала„ вели Јован Трајковски, претставник на семејна компанија која тргува и произведува земјоделски производи.
За да се промени ситуацијата и младите повторно се вратат на нивите Министерството за земјоделство, веќе за наредната година најавува сериозни грантови. Освен финансиски, се планираат и други мерки со кои ќе се врати рентабилноста на земјоделското производство..
Александра Ристевска
