Розовата боја и годинава го исполни Градскиот парк, но зад симболиката стои сериозна порака – ракот на дојка и понатаму e водечка причина за смрт од малигни заболувања кај жените во земјава. Во фокусот на настанот не беше само поддршката на пациентките, туку и потребата од редовни прегледи и навремено реагирање на секоја забележана промена. Организаторите посочија дека токму раното откривање може значително да ги зголеми шансите за успешно лекување.
„Секоја жена со своите две раце да прави редовни само-прегледи, бидејќи искрено верувам дека доколку сами си го познавате телото и сами се борите за вашето здравје, ќе се успее да се најде термин и тој рак ќе биде фатен на време. Знаеме дека 99% преживувањето е поголемо кај жените кои што го детектираат ракот во раните стадиуми.“, изјави Ана Марјановиќ, од здружението „Хема-Онко“/
Во Македонија годишно се регистрирани над 1000 случаи на рак на дојка, а во моментов има околу 7000 пациенти. Како еден од проблемите е издвоена и достапноста на скринингот. Според најавите на Министерот за здравство, Сашо Клековски, ќе се започне со преиспитување на скрининг програмата. Проблеми има и во достапноста на терапијата. Два лека се ставени на позитивната листа и се достапни во аптеките за хроничните болни. Од минатата година е обезбедена и дополнителна финансиска поддршка за Клиниката за торакална и пластична хирургија, со цел да се овозможи пластичен третман на оперативната рана по хируршките интервенции.
„Во моментот главен проблем ни е скрининг програмата. Според ревизијата што се направи од Државниот завод за ревизија, можам да кажам дека е неуспешна и дека мораме комплетно да го премислиме концептот и се надевам многу брзо заедно со Хемо-Онко ќе најдеме јазик да промовираме нов концепт за скрининг. Во однос на третманот, ние префрливе два лека на позитивна листа, за да можат пациентките да гоземаат од аптека, да не мора да доаѓаат на клиниката за онкологија.“, изјави Сашо Клековски, министер за здравство.
Од разговори и дружење до охрабрувачки пораки за превенција – целта е иста: ракот на дојка да се открива порано, лекувањето да биде навремено, а жените кои се соочуваат со болеста да не останат сами . Розовиот пикник појадок веќе трета година по ред е потсетник дека борбата е лична, а поддршката заедничка.
