Да се преиспита начинот на распределба на парите за платено политичко рекламирање на учесниците во изборните кампањи, но и да се усогласат законите кои го уредуваат оданочувањето на изборните активности, бара Државниот завод за ревизија.
Ревизорите објавија и дека над 129 милиони денари од буџетот наменет за изборни активности во 2024 биле пренасочени кон трошоци за политичко рекламирање. По извршената ревизија на финансиските извештаи, од ДЗР потсетуваат дека изборните пари се распределуваат по претходен писмен договор.
Односно, најмногу 45 отсто од рекламниот колач може да искористат двете најголеми политички партии од власта со најмногу гласови за пратеници на последните избори. Исто толку, најмногу 45 проценти по истиот принцип одат за двете опозициски партии, најмногу 7 отсто кај партиите кои немале доволно пратеници да формираат пратеничка група и – 3 проценти за партиите кои не се застапени во Собранието.
