Рестораните во земјава добија нов изглед. Маси поставени на растојание, паравани помеѓу нив, различен распоред и поставеност на ентериерот во локалите, на големо се прават измени за веќе најавеното олабавување на мерките. Официјално соопштение се уште нема, но угостителите не губат време. Се претпоставува дека масите ќе бидат поставени на најмалку два метри растојание, келнерите ќе носат маски или визири, а за почеток ќе работат само летните тераси.
Од Агенцијата за храна и ветеринарство велат дека пред отворање на рестораните, целосната дезинфекција ќе биде неминовна.
„Бидејќи рестораните кои беа затворени не работеа кетеринг и подолг период беа запечатени, ќе ги кажам само главните мерки. Ќе треба да направат повторно чистење и дезинфекција на опремата и површините кои служат за обработка на храна и пред отворањето на рестораните ќе треба да извршат една општа дезинфекција во самиот објект, бидејќи подолго време стоел запечатен, неотворен и не знаеме што се случувало таму“ – вели Зоран Атанасов, директор на АХВ.
Угостителствoтo е еден од најпогодените сектори во земјата, кој од средината на месец март годинава со уредба од Владата беше затворен, се со цел превенција од вирусната инфекција, велат од туристичко – угостителска комора. Најголем дел од угостителите не се задоволни со понудената мерка за поддршка, и тешко ќе можат да ја поминат оваа криза.
“Во однос на економските мерки, на прашањето дали се задоволни од понудената мерка на Владата да даде поддршка, во висина од 9.000 денари или бруто плата од 14.500 денари, 95% одговориле дека не се задоволни, а само 5% дека се задоволни”- изјави Мартин Ангеловски од Туристичко-угостителска комора.
Протоколите со безбедносни мерки за функционирање на угостителстките објекти се во изработка, а министерот за здравство Венко Филипче најави дека до крајот на неделава ќе биде соопштено и кога ќе почнат со работа рестораните.
Адријана Алексиеска
