Градоначалникот на Општина Аеродром, Дејан Митески, денеска изврши увид во градежните активности за целосна реконструкција на кракот на булевар „Трета македонска бригада“ (кај Метро).
-Станува збор за проект со кој за првпат темелно се обновува овој значаен сообраќаен потег во Општина Аеродром. Делницата е во должина од 777 метри, со поставување на околу 6.000 м² нов асфалт, како и тротоари со вкупна површина од 1.500 м², се наведува во соопштението од Општина Аеродром.
Особено е важно што за првпат се поставува и улично осветлување, кое значително ќе ја зголеми безбедноста на граѓаните и ќе придонесе за подобар и посигурен сообраќај.
-Оваа улица е многу фреквентна – ја користат жителите од околината, но и голем број компании што функционираат во овој дел на Аеродром. Вредноста на овој проект изнесува 17 милиони и 908 илјади денари, се наведува во соопштението.
Реконструкцијата, како што велат од Општина Аеродром, е дел од поширок проект за обнова на улици во Општина Аеродром, со вкупна должина од 5,4 километри и вредност од 138 милиони денари, средства обезбедени од македонската Влада преку Министерството за транспорт и врски.
