„Извини, тато, ама мислам дека ништо не згрешив. Јас само не сакам да се мажам. Не сега! – Ајде, прекини. Ќе се мажиш, луѓето дадоа 10.000 евра за тебе.10 илјади евра !!! Знаеш колку пари се тоа? Цел живот да работиме, тие пари нема да ги собереме. – Значи ме продаде, тато ? За тие проклети пари – ме продаде?!“
Со оваа реплика, која е дел од драмски текст, но инспирирана од вистинска животна приказна, прилепските средношколци го креваат својот глас против трговијата со луѓе, а особено против малолетничките бракови чиј број кај нас е во постојан пораст, велат упатените. Причините се различни, но најчесто се лоцираат во извесни семејни традиции, но и во отсуството на комуникација помеѓу родителите и децата. Фрапантно-поразителни се податоците дека во некои средни училишта, само во една генерација има и по неколку вакви бракови, а ученичките кои се одлучуваат на овој чекор, најчесто трајно го напуштаат и училиштето.
„За да ги спречиме малолетничките бракови, често организираме работилници. Вклучени се тука класните раководители, предметните наставници и педагошко-психолошката служба. Многу често е разговарано со учениците, повикувани се на разговор, сооветувани се, меѓутоа, за жал, скоро никогаш не наидуваме на разбирање кај ученичките. Она што одлучиле да го направат – го прават, заминуваат. Последиците се ги согледуваат подоцна, за жал, кога е доцна“ – вели Жанета Видевска, директор на СОУ „Ѓорче Петров“, Прилеп.
„Сега ми се случи едно неубаво искуство. Оваа генерација каде што предавам, уште во прва година, неколку девојчиња, и во прва и во втора година, па и годинава во трета година, се омажија девојчињата млади“ – кажа Билјана Тинтоска, професорка во СОУ „Ѓорче Петров“, Прилеп.
Според СЗО, секојдневно околу 39.000 млади момчиња и девојчиња во светот се жртви на трговијата со луѓе за присилни бракови.
Инаку, по повод 18 октомври – Европскиот ден за борба против трговијата со луѓе, а како дел од Проектот на ЕУ и Советот на Европа „Зајакнување на акцијата против трговијата со луѓе во Македонија“, ученици од ова училиште, во соработка со локалното Радио Пела, ја изготвија радио-драмата и театарската претстава „Маѓепсан круг“, како свој придонес во борбата против ова зло и која премиерно ќе биде изведена токму на 18-ти октомври.
Каролина Дурло
https://www.youtube.com/watch?v=tqCw9S7Vlkg
