Значително заживување на пазарот на недвижности во Македонија покажува најновиот извештај на Регистарот на цени и закупнини за последниот квартал од минатата година.
Регистрирани се вкупно 9.283 трансакции, што е за 964 повеќе во споредба со претходниот квартал. Од нив, 1.004 се новоизградени станови, а дополнителни 27.522 објекти се во фаза на градба. Најскапиот стан во четвртиот квартал од минатата година е продаден во скопската општина Центар по цена од близу 3.000 евра за квадратен метар.
За 83 квадратни метри купувачот платил 246.171 евро. Според Регистарот на цени и закупнини, просечната цена на квадратен метар станбена површина во скопски Центар изнесува 1.800 евра, а најниската просечна цена е постигната во Струмица – 750 евра.
Според обемот на продажба, Аеродром останува лидер со 304 продадени станови, додека Битола доминира кај куќите со 91 продажба. Центар е на врвот кај деловниот простор со 31 единица, а Ѓорче Петров кај градежното земјиште.
