Раководството на Алијансата за Албанците, предводено од партискиот претседател Арбен Таравари, едногласно одлучи да поднесе колективна оставка, соопштија медиумите. Одлуката била донесена на последната седница на партијата, со цел „организациско освежување, вклучување на нови кадри и спроведување длабоки и сеопфатни реформи кои ќе го зајакнат политичкиот профил и внатрешното функционирање на Алијансата за Албанците“.
Од партијата дополнително наведуваат дека оставките се и рефлексија на резултатите од последните локални избори.
До одржувањето на Собранието и Конгресот, управувањето со партијата ќе го врши претседателот Арбен Таравари, а Собранието ќе ги констатира оставките. Според статутарните рокови, Собранието на АА се очекува да се одржи во средината на февруари, додека Конгресот најдоцна до есента годинава.
