Македонија заслужува членство во Европската Унија и тоа многу брзо, рече вечерва министерот за надворешни и европски работи на Република Хрватска, Гордан Грлиќ по средбата со својот домаќин, министерот за надворешни работи и надворешна трговија, Тимчо Муцунски.
Како што истакна Радман, Македонија е подготвена, а и добро е преговорите да почнат, особено поради македонските граѓани.
Според шефот на хрватската дипломатија, Хрватска силно го поддржува македонскиот евроинтеграциски процес и смета дека земјава направи многу на тој пат, како и дека може да биде пример на Балканот.
-Сетете се пред 20 и повеќе години. Пет месеци претходно почнаа преговорите. Да не се случеше тоа што се случи, Македонија можеби ќе беше во ЕУ пред Хрватска. Ако тогаш постоеја реформски услови, тогаш постојат и сега, по 20 години. Кога зборуваме за тој аспект, гледаме перспектива. И за граѓаните на Северна Македонија е важно за еден позитивен, афирмативен, психолошки моментум да почнат преговорите со ЕУ. Мислам и дека во тој процес, во таа перспектива и динамика, Македонија може да оствари голем прогрес зашто според нашето искуство, знаење и уверување, Македонија е подготвена. Се надеваме дека многу скоро ќе се создадат услови за почеток на преговорите за што имате наша искрена поддршка, рече Радман на заедничката прес-конференција.
Тој информира дека меѓу двете земји соработката е одлична во сите сфери, како и дека нема отворени прашања. Како области во кои гледа потенцијал за соработка, тој ги нагласи енергетиката, здравството, туризмот.
-Билатерално бележиме само јакнење на соработката во економијата, стопанството, во сите сфери кои се од заеднички интерес. Ние немаме никакви пречки, меѓу Македонија и Хрватска е се отворено и пријателски. Јас би сакал таква атмосфера каква што имаат нашите две земји да постои и во другите земји од Западен Балкан. Нашата соработка може да биде пример за други земји од Западен Балкан, потенцира Радман.
Хрватскиот министер попладнево имаше тет-а-тет средба со Муцунски, а потоа и билатерална средба помеѓу делегациите на двете министерства.
