Неколку часа пред инаугурацијата на новиот американски претседател, рускиот претседател Владимир Путин му честиташе на Доналд Трамп, додавајќи дека е отворен за дијалог за Украина, за да се постигне траен мир.
„Му честитам на Доналд Трамп за влегувањето во администрацијата. Москва е отворена за дијалог со Соединетите Држави, кој ќе биде изграден на еднаква и взаемна основа – со почитување“, рече Путин, за време на состанокот на Советот за безбедност и одбрана на Русија.
Путин, сепак, нагласи дека руската влада ќе продолжи да се бори за интересите на својот народ, бидејќи, како што рече, тоа била основната цел на специјалната воена операција во Украина.
Рускиот претседател додаде дека досегашниот дијалог е прекинат по вина на администрацијата на претседателот Џо Бајден. Во деновите пред да биде инаугуриран за претседател, Доналд Трамп, во неколку наврати изјави дека ќе се сретне со својот руски колега Владимир Путин многу брзо, откако ќе ја преземе функцијата.
