Дејан Николов, сопственик на автолимарски сервис до диско-клубот „Пулс“ во Кочани, денеска сведочеше пред судот како прв сведок по воведните зборови на 35-те обвинети за пожарот во кој загинаа 63 млади лица, а над 20 беа повредени.
Тој опиша дека при реновирањата дел од прозорците биле заѕидани или затворени одвнатре, а една внатрешна метална врата често била заклучена. Николов сведочеше и за кобната ноќ на 16 март, кога бил во дискотеката со пријатели и своето дете, по што избувнал пожарот.
Во паника, како што кажа, помагал во извлекување и спасување на младите, кршел прозорци со решетки и со црево прскал вода за да им помогне на заглавените во женскиот тоалет, сè до пристигнувањето на пожарникарите. Неговото потресно сведочење ја расплака судницата, а рочиштето продолжува со сослушување на сведоци.
