Во општина Илинден денеска ќе се одржи првата улична атлетска трка „Илинден лајф ран“ (Ilinden life run), спортски настан посветен на промоција на спортот, рекреацијата и здравите животни навики, соопштија од локалната самоуправа.
– Стартот и финишот на трките ќе бидат пред Домот на културата „Илинден“, а учесниците ќе трчаат по обезбедена и означена патека низ населените места Илинден, Марино и Кадино. Програмата започнува во осум часот со трката на пет километри, во девет часот се стартовите на 10 километри и штафетата 2×5 километри, додека во 10 часот се предвидени детските трки на 100, 200, 400 и 600 метри, а за најуспешните учесници и екипи се предвидени пехари и медали – се додава во соопштението.
Поради одржувањето на трката, ќе биде воспоставен посебен сообраќаен режим. Општина Илинден ги повикува граѓаните да ја почитуваат поставената сообраќајна сигнализација и насоките на службените лица.
– Како покровител на овој настан, Општина Илинден уште еднаш ја истакнува својата заложба за поддршка на спортските настани што имаат за цел да ги поттикнат и промовираат спортот, рекреацијата и здравите животни навики – се додава во соопштението.
