Бугарија да почне со проектирање на тунелска цевка, а двете држави истовремено да почнат да пробиваат тунел, да се направи нов проект кој ќе е прифатлив за Македонија и цената да биде во разумна рамка – ова се условите за реализација на железничкото поврзување на Коридорот 8 кај Крива Паланка. Министерот за транспорт Александар Николоски објаснува дека промени мора да има бидејќи за постоечките услови и цена нема согласност од наша страна.
„Почна дијалог вчера во Брисел. Следно за две недели на 31 пак средба. Да видиме. Ние инсистираме на нашите позиции да има заеднички проект и да е изводлив проектот нормално да се разгледа цената, по оваа цена секако дека не можеме. Да видиме што ќе направиме. Јас се уште сум против овој проект. Овој проект сигурно нема да се работи, a дали ќе работиме нов, ќе видиме“, рече Николоски.
Министерството за транспорт потврди дека Македонија е посветена на изградба на железничка пруга кон Бугарија, но нагласи дека не може да се прифати проект што завршува во тунел за кој не постои проект од другата страна.
Додека Скопје покажува конструктивност, Софија демонстрира самоволие – спремни биле да почнат со проектирање но тоа би било готово најрано во 2026 година.
Дека постои консолидиран став во Владата, која не планира да попушти на притисоците и уцените покажува и ставот на македонската делегација во Брисел која вчера, на состанокот со бугарските колеги и со претставници на Европската Комисија укажале на условите. Исходот од состанокот е дека двете страни си подале рака да продолжат со изградбата, а за таа цел ќе има редовен дијалог на високо ниво.
Комисијата го поздравува повторното потврдување на посветеноста на Бугарија и Северна Македонија на Коридорот 8, што ја покажува подготвеноста за регионална соработка која е од суштинско значење за иднината на двете земји.
Инаку, тендерот за реализација на третата фаза од пругата кон Бугарија е пропаднат – и за надзор и за изведба. Сепак, македонската влада уверува дека останува посветена на Коридор 8, а се очекува, разговорите со нашиот источен сосед да се интензивираат по формирањето стабилна политичка влада таму, да се најдат на половина пат и да се договорат за проект кој ќе биде прифатлив за двете страни.
