Во Собранието денеска се одржала проштална средба на претседателот на Собранието Африм Гаши со британскиот амбасадор Метју Лосон, на која биле констатирани одличните билатерални односи меѓу земјава и Обединетото Кралство, кои се одвиваат на редовна основа со развојна динамика.
-Претседателот Гаши посебно ја издвои соработката на ниво на претседатели на парламенти, со осврт на неговата минатогодишна официјална посета на Британскиот парламент. Го истакна значењето на проектната помош за Собранието што се одвива преку Весминстер фондацијата за демократија и со која се зајакнуваат функциите на Собранието и Службата – соопшти собраниската прес-служба.
Амбасадорот Лосон изразил задоволство од одличната соработка со Собранието за време на неговиот мандат, како и од севкупните билатерални односи меѓу Обединетото Кралство и Македонија. Изразил уверување дека истата ќе продолжи со несмалена динамика и со идната амбасадорка.
Двајцата соговорници размениле мислења околу претстојните активности на Собранието, можностите и модалитетите во рамките на веќе утврдената соработка, но и за потенцијалите на друг вид на соработка од взаемен интерес.
-Беше потенцирано значењето на Стратешкото партнерство и Договорот со кој се уредуваат трговските односи меѓу двете земји, како и водечката улога на Обединетото Кралство клучните историски моменти на нашата земја како независна европска демократија – наведуваат од собраниската прес-служба.
Оттаму додаваат дека како знак на благодарност за исклучителниот амбасадорски ангажман и промовирање на односите меѓу двата парламента, претседателот Гаши му врачил пригоден подарок на амбасадорот Лосон.
