Повторно хаос со градскиот превоз. Приватните превозници ги паркираа автобусите во гаражите, поради неисплатениот долг што ЈСП го има кон нив. Приватниците велат дека немаат добиено пари од месец декември, и дека долгот веќе надминал над 150 милиони денари. Од градот Скопје имаат префрлено дел од средствата, на јавното претпријатие но тие пари не стигнале до нив, вели Јовица Зафировски.
„Имаме информација дека градот Скопје има уплатено 40 милиони денари за нас приватните превозници минатата недела, но ЈСП се уште не ни ги уплаќа средствата. Ние ги чекаме тие пари, нека ни ги уплатат и веднаш ние ќе ги вклучиме автобусите за да не чекаат граѓаните на овие пеколни температури“, изјави Јовица Зафировски од „Јофи Бус“.
Првитнициите велат дека повеќе не можат да издржат и дека немаат за нафта. Тие бараат исплата на дел од средствата за да можат колку толку да скрпат крај со крај. Велат немаат повеќе како да ги полнат резервоарите со нафта и тековно да ги одржуваат.
„Ние со тие средства за одредено време ќе можеме да возиме, сега нека ни ги пуштат парите, сега ќе ги пуштиме автобусите“, вели Јовица Зафировски од „Јофи Бус“.
Од ЈСП молк. Засега не одговараат зошто не им се префрлени парите на приватните превозници. И додека надлежните молчат, граѓаните се оставени сами на себе да чекаат на пеколни температури автобус со часови. Веќе неколку дена не возат околу 200 приватни автобуси откако им заврши двегодишниот договор со Град Скопје.
