Како во воена состојба, вака рано изутрината изгледаше локалниот пат што води кон штипското село Драгоево. Војници со десетина армиски возила, чекаа насоки за да тргнат и им се спротистават на пламените јазици, во тешко пристапниот терен на планината Серта. Стихијата не запира. Огнот се гаси од земја и од воздух. Пожарот кој избувна во средата, се подели на три, а дел од огнот се движи и кон Криволак. Најалармантно е во неготинскиот регион, кај селото Калањево. Стотина припадници на Армијата се на терен, откако сношти Владата прогласи кризна состојба во рок од 30дена, а претседателката Сиљановска-Давкова, даде наредба во борбата со огнената стихија се вклучи и војската..
„Рано утрово започнаа механизмите на кризната состојба. На терен покрај локалните пожарникри, дел од силите на Национални шуми, локалното население помагаат и сто припадници на армијата и 30припадници на МВР. Утринава полета и еден полициски хелихоптер којшто активно учествува во гаснењето на пожарот на планината Серта кој е поделен на три крака, а малку подоцна се вклучија и два армиски хелихоптери со големи ведра, околу 2 тона изјави Стојанче Ангелов, директор на ЦУК.
Под контрола се држи ситуацијата во Општина Конче, а засега нема опасност за штипските села Селце и Драгоево. Таму гори ниско стеблеста и дабова шума. Според првичните информации пеплосани се над 80хектари, а огнената линија сношти достигнала пресек од 2,5 до 3,5 километри.
„Пожарот меѓу селата Селце и Драгоево засега е стишен малку. Ќе видиме во попладневните часови каква ќе биде ситуацијата. Со една екипа сме упатени кон Неготино„ изјави Благој Ренџов, командир на ППЕ-Штип.
Од ЦУК информираат дека во последното деноноќие регистрирани се 21 пожар, а во моментот активни се само седум. Гори во општините Чашка, Ново Село, Гевгелија. Од утринава повторно е пуштен регионалниот пат Штип-Неготино, кој сношти поради пламените јазици беше затворен за сообраќај.
