Секојдневниот сообраќаен хаос, а особено во пазарните денови кога центарот на градот е едно долго и небезбедно „тесно грло“, Прилеп ќе го решава со изградба на уште два нови кружни тека, покрај оној пред Центарот за култура чија изградба веќе финишира.
- „Ќе продолжиме да ги решаваме овие сообраќајни проблеми со изградба на кружни текови на вкрстување во населбата „Димо Наредникот“, како и вкрстувањето на Булеварот „Гоце Делчев“ со улица „Прилепски бранители“, односно раскрсницата кај „Градска“, – вели Борче Јовчески, градоначалник на Прилеп.
И покрај наследениот долг од околу 5 милиони евра и кој веќе е намален на само 800.000 евра, и речиси без никаква помош од централната власт, Општина Прилеп во последниве две години успеа да рехабилитира и над 60 улици, во должина од 15 километри и со вкупна површина од 80.000 метри квадратни, потенцира Јовчески. Очекувањата се дека по промената на власта во мај, ваквите инфраструктурни зафати да бидат уште побројни, особено по најавата дека новата власт на ВМРО-ДПМНЕ предвидува од централниот буџет да одвојува значителни средства за развој на општините. За општина Прилеп се предвидуваат по 4 милиони евра, на годишно ниво.
Каролина Дурло
