Претставници на Министерството за јавна администрација на Македонија учествуваат на меѓународниот состанок на Директори на институти и школи за јавна администрација (DISPA), што се одржува во Будва, Црна Гора.
На настанот, кој се одвива под мотото „Иднината на јавната администрација: Лидерство во криза и постигнување резултати“, земаат учество шефот на Кабинетот на министерот за јавна администрација, Маја Рисова Мутлулар, и раководителот на Секторот за обуки, Агрон Меџити.
Состанокот, соопштија од МЈА, организиран од Регионалното училиште за јавна администрација (ReSPA) во соработка со Европската школа за администрација и со поддршка од Делегацијата на Европската Унија во Црна Гора, има за цел да поттикне размена на добри практики, стратегии и иновативни пристапи за унапредување на капацитетите на јавните службеници, особено во услови на криза и неизвесност.
-Јавната администрација мора да се движи во чекор со времето, тоа значи не само технолошка трансформација, туку и суштинска инвестиција во луѓето. Само преку континуирана обука, поддршка и создавање простор за иновации, можеме да создадеме администрација што ќе одговара на потребите на граѓаните, истакна Рисова Мутлулар во своето обраќање.
Настанот ги обедини претставниците од земјите на ЕУ и регионот, со цел градење партнерства и идентификување заеднички приоритети за подобрување на јавните услуги.
Министерството за јавна администрација останува посветено на создавање ефикасна, транспарентна и професионална јавна служба преку регионална соработка, модернизација на системите за обука и развој на човечкиот капитал.
