Претседателката на државата, Гордана Сиљановска-Давкова, за прв пат стави вето и одби да го потпише указот за измените на Законот за заштита на деца, кои предвидуваат воведување на двојазични лиценци за работа во градинките.
Во своето образложение до Собранието, Сиљановска-Давкова истакна дека спорните одредби од членовите 9 и 10 на законот треба да се преиспитаат во согласност со амандманот 5 од Уставот и актуелната регулатива за употреба на јазиците.
Сиљановска-Давкова ги наведува следниве прашања како проблематични: -Лиценците за работа се предвидува да се издаваат на македонски и на јазикот кој го зборуваат најмалку 20% од граѓаните (албански). -Првиот дел од испитот за добивање лиценца треба да се полага електронски, а не во хартиена форма, и тоа на двата јазика. Претседателката потсетува дека јазичната употреба е веќе регулирана со закон, повикувајќи Собранието да обезбеди јасни, прецизни и недвосмислени решенија кои нема да бидат во спротивност со Уставот. Одлуката на Сиљановска-Давкова беше поздравена од СДСМ, кои побараа Владата целосно да се откаже од спорните измени на законот. Тие истакнаа дека спорните одредби кршат унитарноста на државата и се засновани врз неуставен Закон за двојазичност. Од Владата најавија дека Законот за заштита на децата ќе биде доработен и повторно предложен во согласност со законодавните процедури.
Македонија
Македонија
Македонија
Македонија
