Од 60 до 80 хектари опожарена површина, три оштетени викендици и двајца повредени граѓани е билансот од трите пожари што во изминатата недела ги зафатија Штип и штипско. По речиси триесетчасовна интервенција, целосно е изгаснат пожарот што беснееше на непристапниот терен меѓу селата Долани и Љуботен.
Најкритично беше во викенд-населбата Плуждино, каде што пожарот брзо се ширеше кон викендиците. Во обид сами да си ги заштитат имотите, еден граѓанин поради изгореници и вдишување чад заврши во болница.
„Имаше само како мала чурка. По 15 минути се префрли на билото, дуваше југозападен ветер и го префрли кон Ново Село. Се симна долу огнот и почна по ридот. Прво го зафати првиот рид, па Ново Село, клисурата и почна нагоре да се качува пламенот“, изјави Методи Мицевски во четвртокот, кога огнот беснееше на Кумлакот.
Во гаснењето учествуваа пожарникари, доброволци и екипи од повеќе општини. Освен од земја, пожарите се гасеа и од воздух со ер-тракторите на Дирекција за заштита и спасување. На најкритичните места со багери се правеа заштитни појаси за да се спречи понатамошното ширење на огнот.
Според првичните информации, првиот пожар најверојатно бил предизвикан од гром, додека за другите два постојат сомнежи дека се подметнати.
