Четириесет и пет дена по парламентарните избори во Германија, демохристијаните (ЦДУ/ЦСУ) и социјалдемократите (СПД) постигнаа договор за формирање коалициска влада. Оваа среда во 15 часот, раководството на двете партии ќе одржи прес-конференција за да го презентира постигнатиот договор. Според германските медиуми, веќе е договорена поделбата на најважните министерства.
СПД ќе ги преземе Министерството за финансии, Министерството за одбрана и Министерството за правда. Според весникот „Билд“, Министерството за внатрешни работи и Министерството за надворешни работи ќе останат под контрола на демохристијаните.
Претходните денови, најголемиот дел од преговорите се фокусирале на мигрантската политика, како и на даночните и пензиските прашања. Во текот на преговорите, дел од претставниците на ЦДУ го предупредија лидерот на партијата, Фридрих Мерц, да не прави премногу отстапки кон СПД, бидејќи тоа би можело да ја загрози „промената на политичкиот курс“ која беше најавена во кампањата.
ЦДУ на изборите од 23 февруари освои 28,5% од гласовите, што ја направи најсилната политичка сила, но сепак мораше да најде коалициски партнер за да обезбеди мнозинство во Бундестагот, известуваат медиумите.
