Леб, млеко, месо, јајца, овошје и зеленчук. Просечно домаќинство најмногу пари или речиси 160 илјади денари годишно троши на храна и пијалоци. Според податоците на Заводот за статистика, половина од парите одат за оваа намена. Македонците најмногу купувале месо или 38 397 денари и тоа претежно пилешко, а најмалку овчо и јагнешко.
По месото, најголем дел од буџетот за храна одел за млеко, млечни производи и јајца, за што биле потребни 30.411 денари. Секое домаќинство купувало повеќе од 172 килограми леб и 64 килограми компир годишно.
Во просек се пиеле 182 литри безалкохолни пијалоци на годишно ниво. Од алкохол најмногу се пиело пиво – 28,6 литри годишно, по што следи консумацијата на вино и жестоки пијалаци.
За зеленчук се издвојувале над 21 илјади денари, а најмногу се јаделе домати и пиперки, додека најчест избор на менито за ручек , кај Македонците останува гравот.
За овошје пак се трошеле близу 10 илјади денари, а притоа најмногу се консумирало она што не се одгледува во земјава, односно јужно овошје, по што следат јаболката и лубеницата.
Се чини Македонците најмалку консумираат риба. За купување потрошиле нешто над 4 илјади денари.
За шеќер и чоколади се издвојувале во просек по 7 409 денари годишно. Семејствата годинава трошеле над 14 илјади денари за цигари и тутун, а за кафе, чај и какао по скоро 5 илјади денари.
Податоците за потрошувачката се добиени врз основа на анкетата на 5000 домаќинства.
