Насилникот од Радовиш кој брутално ја тепа и пцуе партнерка на Тик Ток ќе се соочи со затворска казна од 6 месеци до 3 години поради сомнение за сторена телесна повреда. Засега, 35 годишникот не е во притвор и Обвинителството испитува дали има основ за негово задржување зад решетки.
Постапката за лицето е во тек врз основа на поднесената кривична пријава. Меѓу другото, ќе се испита дали во конкретниот случај постои основ за негово задржување. Јавното обвинителство и истражните органи имаат обврска да постапуваат единствено врз основа на доказите во предметите, инфомира Обвинителството.
Откако во саботата во живо на ТИК ТОК емитуваше како и удира шамари и тупаници на партнерката, мајката на тепаната жртва пријавила во полиција.
По неколку дена од настанот, видеото стана вирално и јавноста бурно реагираше со апели до истражните органи веднаш да преземат мерки за да спречи евентуално убиство. Се споделуваат и други видеа од насилникот. Како што се пишува на социјалните мрежи, тој преку својот Фејсбук профил се вклучил во живо и се заканувал на мајката на жртвата дека ќе и дојде на работа и ќе ја убие.
Според сведочења објавени на социјалните медиуми, тој бил насилен и со други девојки. Имено, преку Фејсбук друга поранешна партнерка сведочи дека била претепана и горена со цигари и за тоа постоела активна судска постапка.
Инаку тој досега е осудуван за телесна повреда, нарушување на неповредливоста на домот и за навреда. Според пресудата од судот во Радовиш тој заедно со уште едно лице за овие дела се условно осудени со парични казни.