Македонската политичка сцена се загрева за претстојните локални избори закажани за средината на октомври, а подготвувките на партиите се во полн ек. Владејачките ВМРО-ДПМНЕ и ВРЕДИ, како и опозициските СДСМ и Европски фронт, интензивно работат на изборните стратегии, кадровски решенија и теренски активности.
ВМРО-ДПМНЕ најголемиот број на кандидати ќе ги објави до крајот на јули, а за одредени општини ќе зависи и од договорот со партијата ЗНАМ, односно дали ќе се договорат да настапат заеднички само во една или можеби повеќе општини. До сега, владејачката партија има објавено 33 имиња, а кандидатот за Скопје ќе се знае следниот месец.
Лидерот на СДСМ Венко Филипче веќе објави листа од 19 кандидати за градоначалници. На неа се најдоа и неколку актуелни, меѓу кои и градоначалниците на Центар, Чучер-Сандев, Kрива Паланка, Росоман, Крушево.
„Кандидатите се избрани врз основа на најавените принципи, со прилично широк консензус во општинските организации, луѓе кои имаат кредибилитет и легитимитет да ја побараат довербата – некои првпат, некои повторно“, рече Филипче.
Коалицијата ВРЕДИ дел од владејачката структура, вчера официјално го отвори својот Централен изборен штаб на плоштадот Скендербег во Скопје. Лидерите истакнаа дека ќе настапат со кандидати кои се докажани професионалци и успешни луѓе – дури и надвор од политиката. Засега не објавија конкретни имиња – во моментов воделе анкети и го испитувале расположението на граѓаните.. Иако ВРЕДИ најави дека нема да коалицира со ВМРО-ДПМНЕ, останува простор за заемна поддршка меѓу владините партнери во вториот круг.
На опозицискиот блок, Европски фронт најавува силен настап на овие избори преку обединување на ДУИ и Алијансата за Албанците. Се шпекулира дека Али Ахмети, Зијадин Села и Арбен Таравари се на чекор до потпишување на официјална коалиција, која би значела координиран настап во повеќе општини и заеднички кандидати.
