Ситното одбројување до највеселата ноќ во годината, веќе започна. Македонските граѓани забрзано ги прават последните подготовки за дочекот на Новата 2025-та година, за, како што велат, во новите 365 дена да влезат со побогата трпеза од вообичаената, но и да останат доследни на традицијата. Според нивните кажувања и годинава нема да изостане печеното месо, сармите, руската салата, кифличките, благите десерти. Секој според можностите, но и според бројноста на семејствата, кои за жал, се’ повеќе се ретчат, коментираат анкетираните граѓани.
„Па, бидејќи само двајца сме годинава сами дома, солидно, за двајцата само“.
„Кој како може. Нормално дека за Нова година секој дава повеќе“.
„Традоционално, си печеме месо, си печеме петле, бидејќи не можеме мисирки да си дозволиме…Поскапо е многу, многу е поскапо, не очекував, а меркиве што ги презеде Владава, алал да им е, ама народов многу се изопачивме“.
Ние си имаме фармичка, си одгледуваме стока, си имаме се’“.
Обично, како и секогаш – сармите, свинското месо, салатите и во домашен амбиент. Како и секогаш, за храна секогаш има и секогаш се одделува, малку поскромно можеби, ама има“.
„Се’ и сешто, што ќе ни даде Господ – сарми, скара, кифлите се веќе месени. Секој ќе си оддели баш за тој убав ден колку што може, секој ќе си подготви“.
„Новата година ќе ја дочекаме дома, младите ги пуштивме да се шетаат, а трпезата – што ќе даде Господ.Тоа значи оние традиционални јадења – сарма, нешто печено. Новогодишнава кошничка така многу богата беше, па уште побогато да си поминеме, но сакам да посакам здравје, среќа и љубов“.
„За нас старите секако е исто. Како ќе даде Господ понатаму, така. Важно се’ има“, велат граѓаните.
Инаку, како што веќе е познато, и годинава, организиран дочек на Новата година, со богата музичка програма, има и на плоштадите во речиси сите градови во земјава. Во градот под Марковите Кули, за забавата од најлудата ноќ ќе се погрижат најпознатото Ди-џеј Дуо во земјава – „Цирилик“, како и групата „Балканика бенд и маестралниот прилепчанец Сашо Башески. Предновогодишната програма ќе започне утре напладне, која ќе биде наменета за најмладите, а ќе настапат дечињата од Фестивалот „Весели ѕвончиња by Јана“ на Камената бина од Плоштадот „Александрија“.
Каролина Дурло
