Салмонела, е причината за масовното труење кај средношколците кои јаделе во сендвичарата во близина на училиштето во кое учат во Штип . По направените анализи кај дел од регистрираните пациенти, во изметот веќе е изолирана бактеријата која се пренесува исклучиво преку храна која соодветно термички не е обработена. Резултати се чекаат и за останатите пациенти. Во меѓувреме во штипскиот Центар за јавно здравје, регистрирани се уште два нови случаи, со што бројот на затруени се искачи на 17.
„Кај дел од регистрираните случаи од измет е изолирана „Salmonella enteritidis”. Земени се 35 примероци од храна, вработени и работни површини и се испратени во лабараторија во Институтот за јавно. Резултатите од земените примероци се уште се чекат“, велат од Центар за јавно здравје-Штип.
Од заболените петмина се хоспитализирани на Инфективно, во штипската Клиничка болница, а останатите 12 пациенти се лекуваат во дневна болница. Состојбата на сите хоспитализирани е стабилна, информираат од Инфективното одделение. Освен ученици, меѓу затруените има и вработени во училиштето.
Првите случаи на затруени средношколци во Штип,се регистрирани минатиот петок, откако ден претходно ученици и вработени во средно штипско училиште на големиот одмор јаделе сендвич со стек, во блиската сендвичара. Штипските епидемилози направија анкетирање на сите пријавени лица. Извршена е едукација на вработените во сендвичарата, а направен е и вонреден и санитарен преглед на објектот. По наредба на инспекциските служби на АХВ и Државниот здравствен инспекторат, сендвичарата времено ќе биде зтворена, се до добивање на официјалните резултати.