Пред да изгреат првите сончеви зраци, Соња Пикова Рунтева, од Штип, ја продолжува традицијата што ја негува речиси половина век. Во раните утрински часови, таа ги бојадиса велигденските јајца. И оваа година, како и секоја претходна, бојадиса 33 јајца, бројот на годините што ги имал Исус Христос кога бил распнат. Велики Четврток е денот на Тајната вечера и почетокот на Христовото страдање. Јајцето претставува нов живот и надеж, додека црвената боја ја симболизира жртвата и безусловната љубов на Спасителот.
„Се вапцуват рано наутро, пред изгрејсонце, три јајца. Првото јајце е за дома, тоа е чувар на куќата, второто за здравје и бериќет, додека третото е за Исус и во петок се носи на црква… Црвената боја го симболизира Исусовото воскресение, неговата крв“, изјави Соња Пикова Рунтева.
За неа, Велигден не е само подготовка на трпеза, туку време кога семејството се собира и домот се исполнува со топлина, мир и радост. Овој празник потсетува дека меѓусебната почит, љубовта и поддршката меѓу најблиските се најважни.
„Велигден е ден кога се сплотува семејството. На тој ден се собираат најблиските. Денот носи мир и спокој, но и надеж за подобро утре“, изјави Соња Пикова Рунтева.
За Велигден се врзуваат многу обичаи и обреди: мирисот на баклава и милиброд, капењето со црвено јајце и здравец, спротнувањето под маса. Сепак, најважниот момент е дарувањето со јајца во недела. Почитувајќи ја традицијата, им одаваме почит на нашите претци.
„Низ годините на Велигден се вапцуваа само црвени јајца, додека сега се вапцуваат во најразлични бои, украси. Трпезата е полна со најразновидна храна, во минатото го немаше тоа. Целта на Велигден е да го сплоти народот и што помалку изобилие на храна, толку почиста душа. Да им се помогне на луѓето кои немаат, да им се подаде. Тоа е целта на Велигден“, посочува Соња Пикова Рунтева.
Велигден потсетува дека вистинската убавина на празникот се наоѓа во семејството, во сплотеноста, во грижата и љубовта што ги делиме едни со други.
