Започна стопанско-туристичката и културна манифестација „Тиквешки гроздобер“,во рамки на која од денеска до недела во Кавадарци традиционално се реализираат бројни активности во чест на грозјето и виното.
Од локалната самоуправа соопштија дека и оваа година се дочекуваат сите гости кои ќе бидат дел од најголемата гроздоберска приказна во Тиквешијата, како најголем лозаровинарски регион во државата. Оттаму споделија дека на трите бесплатни влеза во градот, денеска, утре и во недела, покрај информациите за паркирање и насочување, гостите ќе ги пречека и едно мало, но, автентично тиквешко изненадување.
– Пакетче со бело и црно грозје од „Кав комерц“ – Кавадарци, подготвено специјално за посетителите на фестивалот – како симболично „добредојде“ од градот кој живее со грозјето и виното. Со грбот на Општина Кавадарци и логото на „Тиквешки гроздобер 2026“, ова мало внимание носи голема порака – традицијата ја пречекува иднината, а Кавадарци ги пречекува своите гости со отворено срце. Очекуваме посетители од земјава и странство, да бидат дел од празникот што секоја година ја раскажува најубавата приказна за нашиот град – информираа од Општина Кавадарци.
Фестивалот на грозјето и виното започна со гроздоберска трпеза среде Кавадарци. На трпезата можеа да се вкусат грозје и маџун од гроздови зрна, како и кавадаречки пишии и сирење.
Покрај Гроздоберска трпеза, имаше и дефиле на Здружение на пензионери.
– Карневалското дефиле со учество на бројни карневалски групи од државава и светот, е утре попладне, а детскиот карневал, во недела – споделија од Општината.
На агендата денеска е и традиционалниот турнир „Сестри Китеви“ во спортската сала „Јасмин“, а во Вински музеј попладне ќе има прием на претставници од Европската федерација на карневалски градови.
Вечер во Музеј – галеријата, Куќа на мирис и вкус, ќе се одржат свечена академија и промоција на монографија, „50 години Музеј галерија – Кавадарци“.
Од Општината рекоа дека во рамките на фестивалот, ќе има и многубројни други интересни содржини.
