Млаки радијатори за скопјани. Ниските температури две недели порано ја стартуваа грејната сезона. Дел од скопјани веќе чувствуваат минимално затоплување во домовите и велат дека топлата вода навреме протече во радијаторите. Но има и такви кои се жалат дека во нивните станови, грејните тела се уште се ладни. Велат навремено ги плаќаат сметките па очекуваат топли радијатори посебно постарите и оние кои имаат мали деца .
Според регулативата, грејната сезона почнува предвреме само кога средната дневна температура ќе падне под 12 степени. Од Управата за хидрометеоролошки работи за денес најавија пониски температури некаде околу 10 степени, и со тоа се исполните условите за почеток на греењето. Од АД ЕСМ (Електростопанство на Македонија) уверуваат дека системот е подготвен и условите за производство и испорака се исполнети. Апелираат граѓаните да ги проверат своите внатрешни инсталации и редовно да ги плаќаат сметките за струја, за топлината да стигне без прекини. Екипите се подготвени за интервенции на терен, доколку се појават проблеми со испораката. Заедниците на сопственици треба да обезбедат непречен пристап на службените лица до топлинските потстаници и редовно електрично напојување во топлинската станица.
Граѓаните очекуваат топлината да стигне во нивните домови рамномерно и без проблеми во сите делови на градот. Тие ќе можат секој ден до 15 октомври, на веб-страната на ЕСМ да проверат дали се исполнети условите за греење за наредниот ден. Во Скопје преку овој систем има 62.600 активни потрошувачи.
