Пожарот на Градската депонија „Алинци“, по тридневна борба со огнената стихија, ставен е под контрола. Со заедничка координирана акција на ТППЕ, на Општината, на комуналните претпријатија, на општествено-одговорни компании, но и на надлежните државни служби, во текот на денешниот ден се очекува, горењето и целосно да биде санирано. Првичните сомневања се дека пожарот е предизвикан од човечки фактор, заради што информирано е и МВР, кое веќе ги презема и соодветните мерки за пронаоѓање на сторителот.
„Веќе трет ден се работи паралелно на полевање со вода, на намалување на огнените јазици, засипување со земја затоа што единствениот начин за да се изгаси пожар на депонија е тој. Ова се случува веќе четврт пат во две години и енавистина сериозен проблем кој треба да се решава. Долгорочното решение е Регионалната депонија во Нова ци која што треба да почне да функционира, а параелно треба да се работи и на деклутивација на оваа депонија“, – вели Дејан Проданоски, градоначалник на Прилеп.
Со оглед на фактот што во непосредна близина на Депонијата се наоѓа и новата Фабрика за секундарна селекција за отпад чија доизградба веќе е во завршна фаза, на овој простор треба да бидат поставени и надзорни камери, но и професионална и побројна чуварска служба, бидејќи станува збор за огромен простор.
„Дојдовме до напојувањето со електрична енергија. Се договоривме со ЕВН за да се направи приклучок на посебен корисник. Договоривме динамика на работите. За брзо би се почнало, ги добивме сите дозволи за прокоп за да се постави кабел во должина од 2 км, најблиската трафостаница е таму. Имаме уште дел срредства во резерва на сметката добиени од Министертсвото за животна средина. Од тие 90 милиони денари, дел би се искористиле за дополнително таа Фабрика да се огради и да се постави видео-надзор, со што би се зголемила и безбедноста на отворената депонија и верувам дека уште овие две години граѓаните ќе бидат оптоварени со ваквите прашања“ – појаснува Проданоски.
Инаку, Општина Прилеп е една од 18-те општините кои се опфатени со идната Регионална депонија во Новаци, пришто истовремено, Прилеп ќе биде и Претоварна станица, со можност преку новата Фабрика за селекција на отпад, таа услуга да им се врши и на другите општини за соодветен надоместок.
